​​​Húsfélagið Strikið 2-12

Strikið 31.01.2025

 

Upplýsingar frá stjórn húsfélagsins til allra íbúa við Strikið 2-12.

 

Sameign eða séreign ?

Hér hjá okkur á Strikinu 2-12 eru 133 íbúðir í séreign og einnig rekum við íbúarnir nokkuð stóra sameign sem allir eigendur bera kostnað af. Mikilvægt er að sem gleggstar upplýsingar séu til staðar um hvað telst til séreignar og hvað til sameignar.

Segja má að afmörkun eignarhluta í séreign og sameign sé grundvöllur annarra reglna sem lúta að samskiptum eigenda og það getur haft mikla þýðingu að greina þessi mörk.

 

Um þessi mál er fjallað í lögum um fjöleignahús en þrátt fyrir það hefur kærunefnd fjöleignarhúsamála þurft að úrskurða í ágreinismálum og einnig hefur Húsgeigendafélagið gefið út góðar leiðbeinandi greinagerðir

 Það sem hér fer á eftir er byggt á þessum þremur heimildum.

 

Lagnir í fjöleignahúsum

Ástæðan fyrir því að hér verður eingöngu fjallað um lagnakerfin í húsinu er sú staðreynd að flest tjón sem orðið hafa á húseigninni eru vegna leka frá lögnum og búnaði og því ástæða til að skoða ábyrgðarskiptingu þeirra tjóna sérstaklega.

 

Í fjöleignarhúsalögunum segir að allar lagnir séu sameign, svo sem fyrir heitt vatn, kalt vatn, skolp o.fl., ef þær þjóna þörfum heildarinnar, án tillits til þess hvar þær liggja í húsinu.

Lagnir sem þjóna eingöngu þörfum viðkomandi séreignar (íbúðar)  teljast sérlagnir þ.e. eru í eigu og á ábyrgð viðkomandi séreignar.

 

Þegar fyrir liggur að lagnir teljast sameiginlegar hefur það þau áhrif að kostnaður sem til

fellur vegna þeirra telst sameiginlegur og skiptist eftir eignarhlutföllum íbúða í sameigninni.

Á það jafnt við um endurnýjun lagna, viðgerðir, hreinsun eða stíflulosun.

 

Allar lagnir eru í sameign þar til lögnin kemur út úr vegg eða upp úr gólfi í séreign (íbúðinni).

Þau tæki og sá búnaður í íbúðum hússins sem tengjast hinu sameiginlega lagnakerfi eru aftur á

móti í séreign íbúðareiganda. Hér má nefna ofna, vatnskrana, salerni o.s.frv. Eigandi

íbúðar ber því bæði ábyrgð á þessari séreign sinni og kostnað við endurnýjun og viðhald.

 

Hver ber ábyrgð á tjóni af völdum leka frá leiðslu ?

Tjón á fasteigninni sem verður vegna leka frá sameiginlegum lögnum húsfélagsins, hvort heldur sem rekja má það til vanrækslu á viðhaldi eða bilanna, ber húsfélagið skaðabótaábyrgð gagnvart þeim eigendum sem fyrir tjóni verða. Tjónið skiptist þá á milli eigenda hússins eftir eignarhlutföllum þeirra í húsinu.

Á sama hátt er það eigandi séreignar sem ber skaðabótaábyrgðina ef leki frá lögnum eða búnaði innan séreignar veldur tjóni.

 

Til að takmarka það fjárhagslega tjón sem húsfélagið og/ eða íbúðareigendur verða fyrir ef til tjóns kemur, hefur Húsfélagið Strikið 2-12 keypt s.k. húseigendatryggingu sem er sameiginleg fyrir alla eignina og bætir tjón á fasteigninni (ATH. EKKI Á INNBÚI). (VÍS,  Vátryggingarskilmálar nr. GF15)

Athugið að svalaskjól þarf að tryggja sérstaklega, nema að þau séu inni í mati fasteignarinnar, 

en eigendur þurfa sjálfir að ganga úr skugga um það. Húsnæðis- og mannvirkjastofnun gefur upplýsingar um hvort svalaskjól sé inni í matsverðinu.

Hafa verður í huga að núverandi sjálfsábyrgð í hverju tjóni er 135.700,- krónur.

Sú eign (sameign / séreign) sem „á tjónið“  ber að greiða sjálfsábyrgðina.

Samkvæmt leiðbeiningum frá Húseigendafélaginu er hússjóði ekki heimilt að greiða sjálfsábyrgð séreigna, enda ávallt litið svo á að kostnaður vegna séreigna sé hússjóði óviðkomandi.

Bent skal á að heimilistrygging þess sem fyrir tjóni verður bætir í flestum tilfellum skemmdir sem verður á innbúi sökum vatnsleka og er því ástæða til að íbúðareigendur yfirfari sínar tryggingar vel.